Salat með vatnssteiktu grænmeti

Að steikja með vatni frekar en olíu er matreiðsluaðferð sem ég mæli hiklaust með.

 Hollustuspekúlant nokkur kom í sjónvarpið nýlega og talaði illa um olíusteikingar en mælti eindregið með vatnssteikingum sem hann sagði að hefði verið algeng fyrr á öldum.             

   Vatnssteiking er ekki eins og suða, því við vatnssteikingu hitnar maturinn á annan hátt og nær jafnvel að brúnast aðeins vegna þess hve vatnið er í litlu magni.  Krydd sem sett er útí virkar líka vel og á annan hátt en við suðu. Eftir steikinguna er olíu svo hellt yfir að vild. Ég notaði stálpönnu, veit ekki hvort teflon virkar jafn vel.

 

Prófið þetta salat mér finnst það algert æði. Gott eitt sér og frábært með fiski

 

1 miðlungs stór stilkur af spergilkáli
2 gulrætur

5-6 sveppir

1 steinseljurót (má sleppa)
2 msk graskersfræ
5 sneiðar sólþurrkaðir tómatar í olíu
1 dl vatn
salt
10 lauf fersk basilika
1-2 msk ólifuolía (bragðbætt með basiliku mjög góð)
1/2  poki klettasalatsblanda

1.    

Skerið spergilkálið  og sveppina smátt og gulrætur og steinseljurót í þunnar sneiðar. Hitið pönnuna. Þegar pannan er orðin heit hellið þá um 1/2 dl af vatni út á.  Setjið grænmetið út á pönnuna og steikið það í vatninu í um 5 mínútur.  Hrærið í  á meðan steikingu stendur og dreypið meira vatni  út á ef þörf er á. Eftir 5 mínútna steikingu setjið graskersfræin á pönnuna og steikið áfram í 2 mínútur. Takið pönnuna af hitanum og saltið.

 

2.    

Skerið sólþurrkuðu tómatana smátt og saxið basilikuna. Blandið steikta grænmetinu, tómötum, basiliku og klettasalati saman í skál og dreypið olíunni yfir. Berið fram og njótið.

Athugasemdir

[Guðrún Þóra Hjaltadóttir, 17.4.2007 kl. 10:07]

Spennandi uppskrift. Það er oft ástæðulaust að steikja, þá er nægjanlegt að sjóða. Smá ábending, við steikum ekki í vatni við sjóðum í vatni.

[Guðrún Jóhannsdóttir, 17.4.2007 kl. 10:42]

Takk fyrir þetta nafna. En málið er eimitt að hér er ekki verið að sjóða í vatni heldur steikja í því.  Finndu muninn!

[Anna Theodóra Rögnvaldsdóttir, 17.4.2007 kl. 13:56]

Prófa þetta, hljómar mjög vel. Ég hef notað þessa aðferð með fisk, s.s. steikja í örlitlu vatni með roðhliðina niður. En þá má eiginlega segja að fiskurinn soðni í eigin safa.